काठमाडौं,१३ असोज । सरकारले विदेशी पर्यटकहरुका लागि अनराइभल भिसा खुला गरेको छ । कोरोना महामारीका  कारण सरकारले गत फागुन देखि अनराइभल भिसा बन्द गरेको थियो ।

कात्तिक १ गतेबाट पदयात्रा र पर्वतारोहणका लागि खुला गरे पनि अनराइभल भिसा भने खुला गरेको थिएन । पर्यटन व्यवसायीहरुले सरकारसँग पटक–पटक अनराइभल भिसाका लागि पहल गर्दै आएका थिए ।

सोमबार पर्यटन विभागले जारी गरेको सूचनाअनुसार नेपाल आउने पर्यटकहरुले अनिवार्य रुपमा ७ दिन क्वारेन्टाइनमा बस्नुपर्ने प्रावधान बनाएको छ । योसँगै नेपाल आउँदा ७२ घण्टाको पीसीआर रिपोर्ट देखाउनुपर्ने छ । यो प्रमाणपत्र अध्यागमन विभागले भिसा दिने समयमै हेर्नेछ ।

नेपाल आउने सबै पर्यटकको ५ हजार अमेरिकी डलर प्रतिव्यक्ति बराबरको बिमा गरिएको कागजातसमेत अनिवार्य गरिएको छ ।
पदयात्रा वा पर्वतारोही दलले आरोहण अनुमति लिनुपूर्व नेपालबाट साथमा जाने सदस्यको कम्तीमा १ लाख रुपैयाँको कोरोनासम्बन्धी बिमा गर्नुपर्ने छ ।

अनराइभल भिसा दिने निर्णय स्वागत गर्दै व्यबसायीहरुले क्वारेन्टाइनको अवधि ७ दिनलाई घटाएर ३ दिन कायम गर्न माग गरेका छन्।