काठमाडाैँ –  सरकारले संघीय संसद्को अधिवेशन आह्वानका लागि सिफारिस गरेको छ।

मंगलबार सिंहदरबारमा बसेको मन्त्रिपरिषद् बैठकले आगामी वैशाख २८ गते दिउँसो २ बजे संघीय संसद्को अधिवेशन आह्वान गर्न राष्ट्रपति रामचन्द्र पौडेल समक्ष सिफारिस गर्ने निर्णय गरेको सरकारका प्रवक्ता तथा शिक्षामन्त्री सस्मित पोखरेलले दिएका छन्।

यसअघि मन्त्रिपरिषद्ले अधिवेशन आह्वानका लागि सिफारिस गरेपछि राष्ट्रपति पौडेलले वैशाख १७ गते दिउँसो २ बजेका लागि संघीय संसद्का दुवै सदनको अधिवेशन बोलाएका थिए। तर, नेपालको संविधानको धारा ९३ को उपधारा (१) बमोजिम आह्वान गरिएको उक्त अधिवेशन सरकारकै सिफारिसमा वैशाख १० गते स्थगित गरिएको थियो।

अब पुनः सरकारले नयाँ मिति तय गर्दै वैशाख २८ गतेका लागि अधिवेशन आह्वान गर्न सिफारिस गरेको हो।