रसुवा, ३ पुस । कोभिड १९ का कारण मुलुकको समग्र पर्यटन क्षेत्र प्रभावित भइरहँदा यसको असर स्वाभाविक रूपमा पदयात्रा (ट्रेकिङ) गतिविधिमा पनि परेको छ । नेपालका प्रमुख पदयात्रा गन्तव्यमध्ये लाङटाङ पर्यटकीय क्षेत्र पनि यसबाट अलग रहन सकेको छैन ।
गत वर्षको तुलनामा यस वर्ष लाङटाङ पर्यटकीय क्षेत्रमा आउने पर्यटक ९३ प्रतिशतले घटेका छन् । चालू आर्थिक वर्षको साउनदेखि मङ्सिर मसान्तसम्म ९८९ पर्यटकले लाङटाङ राष्ट्रिय निकुञ्ज क्षेत्रको इलाकामा पर्ने लाङटाङ तथा गोसाइँकुण्डको हिमशृंखला, कुण्ड तथा ताल, झर्ना र यहाँका जैविक विविधताको अवलोकन गरेका थिए ।
गत वर्षको यसै अवधिमा भने १४ हजार ९३३ पर्यटक आएको तथ्यांके लाङटाङ राष्ट्रिय निकुञ्जले बताएको राससमा उल्लेख छ । निकुञ्ज कार्यालयका अनुसार चालू आर्थिक वर्षमा आएका पर्यटकमा ६६ विदेशी र ९२३ स्वदेशी रहेका छन् ।
निकुञ्ज क्षेत्रको भ्रमण गर्ने स्वदेशी पर्यटकका लागि प्रतिव्यक्ति रु १०० र विदेशीको हकमा रु तीन हजार आगमन शुल्क लिने कानूनी प्रावधान छ । प्रवेश शुल्कवापत गत वर्ष यस अवधिमा रू. ३ करोड १९ लाख ४८ हजार असुली भएको छ ।
