२६ चैत्र, बाँके । बाँकेमा बिहीबार थप १३ जनामा कोरोना संक्रमण देखिएको छ। भारतबाट काम गरेर फर्किएका एकजना र भेरी अस्पताल, नेपालगञ्जमा गरिएको परीक्षणमा अन्य १२ जनामा कोरोना देखिएको हो।
भारतको गुजरातबाट आएका बाँके बैजनाथ गाउँपालिकाका २१ वर्षीय युवालाई कोरोना पुष्टि भएको छ।
भारतबाट घर फर्किएका नेपालीलाई नेपालगञ्ज नाकामा जाँच गर्ने व्यवस्था मिलाइएको छ। भारतको गुजरात, मुम्बई, दिल्ली लगायत ठाउँबाट आएकालाई विशेष निगरानी गर्ने गरिएको छ।
खेतीपातीको सिजन सुरु हुन थालेकाले नेपालीहरु घर फर्किरहेका छन्।
यता भेरी अस्पताल नेपालगञ्जमा गरिएको परीक्षणमा नेपालगञ्जका नौ जना, टीकापुर, खजुरा र बैतडीका एक/एक जनामा कोरोना देखिएको हो।
अस्पतालका अनुसार पछिल्लो २४ घण्टामा ३५ जनाको परीक्षण गरिएको थियो। बाँकेमा फेरि दैनिकजसो नै कोरोना संक्रमित देखिन थालेका छन्। भेरीले जाँच गरेकोमा अहिलेसम्म ५ हजार ५ सय ७५ जनालाई कोरोना पुष्टि भइसकेको छ।
