बारा। बारामा रहेको एक मात्र कोरोना अस्पताल भरिएपछि अब के गर्ने भन्ने चिन्ता थपिएको छ । गत बैशाख १७ गते पहिलो पटक दुई जना संक्रमित भेटिएको बारामा त्यसयता दैनिक रुपमा संक्रमित बढिरहेका छन् ।
जिल्ला प्रशासन कार्यालयका अनुसार बिभिन्न स्थानीय तहका क्वारेन्टाईनमा एक हजार दुई सय ८७ जना छन्, स्वाब संकलन गरेर परिक्षणका लागि पठाईएका तीन सय जनाको रिपोर्ट आउन बाँकी छ ।
तर जिल्लामा अव थपिने संक्रमितको उपचारका लागि आईसोलेसन तयारी अवस्थामा छैन । ‘संक्रमणको अहिलेको अवस्था हेर्दा जिल्लामा अझै ८० देखी ९० जनासम्म संक्रमित बढ्न सक्ने आंकलन गरिएको छ ।’ प्रमुख जिल्ला अधिकारी रुद्रप्रसाद पण्डितले नयाँ संक्रमितको उपचार गर्ने ठाउ अस्पतालमा नरहेको जानकारी दिनुभयो ।
पछिल्लो समय सिमा क्षेत्रबाट उद्धार गरेर क्वारेन्टाईनमा राखिएका आधाजसो व्यक्तिमा कोरोना पोजेटिभ देखिएको छ । भारतसँग खुला सिमाना भएका कारण जिल्लाका बिभिन्न स्थानीय तहमा लुकिछिपि मानिस प्रवेश गर्ने क्रम पनि रोकिएको छैन ।
