लन्डन । आइतबार लिभरपुलले इंग्लिस प्रिमियर लिगमा एस्टन भिल्लालाई २–० ले हराएर घरमा यो सिजन शतप्रतिशत प्रदर्शन कायम राख्यो । एनफिल्डमा यस सिजन खेलेका १७ खेलमध्ये यो लगातार १७ औं जित हो ।

म्यानचेस्टर सिटीविरुद्ध ठूलो अन्तरको हार बेहोरेको लिभरपुलले भिल्लाविरुद्ध पनि जितका लागि संघर्ष गर्नु परेको थियो । उसका लागि साडियो मानेले ७१ औं मिनेटमा पहिलो गोल गरे । कर्टिस जोन्सले ८९ औ मिनेटमा दोस्रो गोल थपे ।

आइतबारकै अर्को खेलमा भने म्यानचेस्टर सिटी साउथह्याम्पटनको हातबाट १–० ले पराजित रह्यो । खेलको निर्णायक गोल चे एडम्सले गरे । यो सिजन लिगमा सिटीको यो नवौं हार हो ।

यो जितपछि साउथह्याम्पटन गणितीय रूपमा प्रिमियर लिगमै कायम रहने निश्चित भएको छ । उसको ४३ अंक भएको छ र १३ औं स्थानमा रहेको छ ।