काठमाडौं,१४ असोज। रसियामा कोरोनाभाइरसको खोप निर्माणमा संलग्न रसियन डाइरेक्ट इन्भेस्टमेन्ट फन्ड (आरडिआइएफ) ले नेपाललाई २ करोड ५० लाख डोज स्पुतनिक भी नामको कोरोना खोप उपलब्ध गराउने घोषणा गरेको छ । नेपालमा यो खोप ट्रिनिटी फर्मास्युटिकल्स मार्फत उपलब्ध हुनेछ ।
फन्डले अरु देशलाई पनि यो खोप उपलब्ध गराइरहेको छ । भारतमा फन्डले १० करोड डोज खोप उपलब्ध गराउने यसअघि नै घोषणा गरिसकेको छ । रसियाका राष्ट्रपति भ्लादिमिर पुटिनले स्पुतनिक भ्याक्सिन सुरक्षित र प्रभावकारी रहेको बताइसकेका छन् ।
नेपाललाई उपलब्ध गराइने खोप क्लिनिकल ट्रायलका रुपमा पनि प्रयोग गरिने छ ।
रसियामा केही वरिष्ट अधिकारी र राजनीतिक नेताहरुले यो खोप लिइसकेका छन् र राष्ट्रपति पुटिनले पनि आफ्नी एक छोरीले यो खोप लगाएको बताएका छन् ।
यद्यपी यो खोप कहिले नेपालमा आपूर्ति र वितरण हुन्छ भन्ने स्पष्ट भइसकेको छैन । नेपाल सरकारले पनि यस खोपका बारेमा केही बताएको छैन ।
ट्रिनिटी फर्मास्युटकल्सका निर्देशक किशाेर अधिकारीले नेपाल सरकारले अनुमति दिनासाथ नेपालमा स्पुतनिक खाेप वितरण शुरू हुने फन्डद्वारा जारी विज्ञप्तिमा उल्लेख छ ।