काठमाडौं । दूरसञ्चार क्षेत्रको नियमनकारी निकाय नेपाल दूरसञ्चार प्राधिकरणले पहिलो पटक स्वतन्त्र परामर्शदाता कम्पनीमार्फत दूरसञ्चार सेवाको गुणस्तरको परिक्षण गराउने भएको छ ।
प्राधिकरणले त्यसको लागि ईच्छुक कम्पनीहरुसँग प्रस्ताव माग गर्दै नेपालका टेलिकम कम्पनीहरुको सेवाको गुणस्तर परीक्षण मापन तथा अध्ययन गराउन लागेको हो ।
सो अध्ययन तथा परीक्षणमा नेपालका टेलिकम अपरेटरहरुको भ्वाईस सेवा, डाटा तथा एसएमएस सेवाको गुणस्तरको अध्ययन तथा परीक्षण गर्नुपर्नेछ ।
सो टेण्डर प्राप्त गर्ने कम्पनीले नेपालमा हाल संचालनमा रहेका टेलिकम अपरेटरहरुले प्रदान गर्दै आएको सेवाको विभिन्न स्थान र क्षेत्रहरुमा गएर करिब ४ महिनामा परीक्षण गरी प्रतिवेदन पेश गर्नुपर्नेछ ।
सो अन्तरगत टेलिकम सेवा प्रदायकहरुको सेवाको लागि ड्राइभ टेस्ट गरिनेछ भने त्यस्तो ड्राइभ टेस्ट प्रदेश १ अन्तरगतको बिराटनगर, बिर्तामोड र ईलामको शहरी र ग्रामीण क्षेत्रमा गर्नुपर्नेछ ।
त्यसैगरि प्रदेश २ को जनकपुर, लाहान र बिरगंजको शहरी तथा ग्रामीण क्षेत्र र गण्डकी प्रदेशको गोरखा, दमौली र कास्की जिल्लाको शहरी र ग्रामीण क्षेत्रमा टेलिकम सेवाको गुणस्तरको अध्ययन, मापन र परीक्षण गरिनेछ।
यसबाहेक सो क्षेत्रमा पर्ने राजमार्ग एरियामा समेत गुणस्तर परीक्षण गर्नुपर्ने प्राबधान तोकिएको छ ।
प्राधिकरणले दूरसञ्चार सेवा प्रदायकहरुको गुणस्तर परीक्षण र अनुगमन गर्नका लागि यसअघि नै टेलिकम्यूनिकेसन्स सर्भिस क्वालिटी २०७३ विनियमावली लागू गरिसकेको छ ।
प्राधिकरणका प्रवक्ता मिन प्रसाद अर्यालले पहिलो पटक स्वतन्त्र परामर्शदातामार्फत टेलिकम अपरेटरहरुको सेवाको गुणस्तर मापन गर्न लागेको जानकारी दिए ।
‘हामीले यसअघि आफैंले गुणस्तर परीक्षण र मापन गरिरहेका थियौं, तर अहिले हामीसँग जनशक्तिको कमी पनि छ, त्यसैले स्वतन्त्र परामर्शदाताबाट गराउँदा सहि तथ्यांक आउने अपेक्षासहित टेण्डर खुलाएका हौं,’ प्रवक्ता अर्यालले भने ।
उनकाअनुसार यस गुणस्तर परीक्षणमा मोबाइल ब्रोडब्याण्ड गुणस्तरको सही तथ्यांक आउने अपेक्षा गरिएको छ ।
यसको लागि प्राधिकरणले करिब ६० लाख रुपैयाँ बजेट छुट्याएको छ ।
नेपालमा हाल नेपाल टेलिकम, एनसेल आजियाटा र स्मार्ट टेलिकम गरि ३ वटा टेलिकम अपरेटरको सेवा संचालनमा रहेका छन् ।