११ माघ, काठमाडौं । सरकारले कोरोनाभाइरस विरुद्धको कोभिशिल्ड खोप १४ गतेदेखि दिन सुरु गर्ने भएको छ । कोरोनाविरुद्धको खोप अभियान १४ गते अर्थात बुधबार १० बजे प्रधानमन्त्री केपी शर्मा ओलीले भर्चुअल मध्यमबाट उद्घाटन गर्ने कार्यक्रम रहेको स्वास्थ्य तथा जनसंख्या मन्त्रायलयले जनाएको छ ।
भारत सरकारले अनुदान सहयोगमा दिएको १० लाख डोज खोप नेपाल सरकारले पहिलो चरणमा फ्रन्टलाइनमा रहेका कर्मचारीहरुलाई लगाइने निर्णय गरेको हो । खोप अभियानको प्रथम चरणको प्राथमिकतामा स्वास्थ्यकर्मी, सरसफाइकर्मी, एम्बुलेन्सका चालक, शव व्यवस्थापक, सुरक्षाकर्मी पर्छन् ।
आइतबार सातै प्रदेशका मुख्यमन्त्रीसँग भएको छलफलमा स्वास्थ्य मन्त्री हृदयेश त्रिपाठीले १४ गते खोप कार्यक्रम सञ्चालन गर्ने बारे छलफल गर्नुभएको छ । सरकारले कोरोना भाइरसविरुद्धको खोपको पहिलो डोज लगाएको एक महिनापछि दोस्रो डोज लगाउने भएको छ ।
