तस्वीर : एपी
कतारमा सन् २०२२ मा हुने आगामी विश्वकपको दक्षिण अमेरिकी छनौट अन्तर्गत पाँचौं चरणको खेलमा ब्राजिलले तेस्रो स्थानमा रहेको इक्वेडरलाई २–० गोल अन्तरले पराजित गरेको छ ।
शनिबार बिहान सम्पन्न खेलमा ब्राजिलका तर्फबाट रिचार्लिसनले ६५ औं मिनेटमा पहिलो तथा नेमारले पेनाल्टीबाट गोल गरेका थिए ।
यो जितसँगै दक्षिण अमेरिकी समूहबाट ब्राजिलले खेलेका पाँचै खेल जितेर १५ अंकका साथ छनौट हुने अवस्थामा पुगेको छ । दोस्रो स्थानमा रहेको अर्जेन्टिनाको पाँच खेलबाट ११ अंक छ ।
अंक तालिकाः (पाँच खेल खेलिसकेको अवस्थामा)
१. ब्राजिल –– १५ अंक
२. अर्जेन्टिना –– ११ अंक
३. इक्वेडर –– ९ अंक
४. पाराग्वे –– ७ अंक
५. कोलम्बिया –– ७ अंक
६. चिली –– ५ अंक
दक्षिण अमेरिकी समूहमा १० टिम राउन्ड रोबिनका लागि छनौट भइसकेका छन् । यीमध्ये सबैभन्दा बढी अंक ल्याउने चार वटा टिम सोझै विश्वकपका लागि छनौट हुनेछन् भने पाँचौं टिमले अन्य महादेशको टिमसँग प्रतिस्पर्धा गर्न पाउने छ ।
मङ्गलबारका खेल
अर्को राउन्डका खेलहरु मङ्गलबार हुँदैछन् । पाराग्वेसँग ब्राजिलको भिडन्त हुनेछ भने कोलम्बियाले दोस्रो स्थानको अर्जेन्टिनासँग खेल्दैछ । त्यस्तै, इक्वेडरसँग पेरु, भेनेजुएलासँग उरुग्वे तथा चिलीसँग बोलिभियाको खेल हुनेछ ।
