रसुवा । समुदायमा पुगेर जनताका अपेक्षा, सुझाव र गुनासा सुन्ने नेपाली कांग्रेसको ‘समुदायमा कांग्रेस’ अभियान शनिबारदेखि सुरु भएको छ । स्थानीयस्तरमा सेवा प्रवाहको अवस्था, विकास निर्माण र समुदायमा भएका असल अभ्यासको अवलोकन गर्ने र जनताबाट आएका सुझावलाई त्यहीँ कार्यान्वयनका लागि पहलकदमी लिने भन्दै कांग्रेसले शनिबारदेखि यो अभियान सुरु गरेको हो ।
अभियान अन्तर्गत आज रसुवाको आमाछोदिङमो गाउँपालिकामा कांग्रस केन्द्रिय सदस्य एवं प्रतिनिधि सभा सदस्य ई.मोहन आचार्यले सबै कार्यकर्ता तथा स्थानीय नेताहरुलाई पार्टीका लागि आवश्यक सुझाव दिन र आफ्ना समस्या र गुनासाहरु खुलेरै राख्न आग्रह गर्नुभएको थियो । उहाँले अब पार्टीलाई समुदायस्तरमा नभएर प्रत्येक नेपालीका घरघरसम्म पुर्याउने अभियान सञ्चालन गर्न सबैसँग आग्रह गर्नुभयो ।
केन्द्रिय प्रतिनिधि ध्रुव अधिकारीले यस अभियानमा खटिएका नेताहरुले बोल्नेभन्दा पनि स्थानीयका गुनासा सुन्ने कार्यक्रम रहेको बताउनुभयो । यो अभियान निकै प्रभावकारी रहेको उहाँले बताउनु भयो ।
कार्यक्रममा बागमती प्रदेश सभा सदस्य प्रभात तामाङ , जिल्ला पार्टी सभापति पेम्बाछिरिङ तामाङ , जिल्ला स्थित पार्टीको जिल्ला कार्यसमिति,प्रदेश, क्षेत्रीय कार्यसमिति र गाउँपालिका कार्यसमितिको पदाधिकारी एवं पार्टीमा आवद्ध सुभेच्छुक संघ/संस्था र भातृ सङ्गठनहरुको प्रतिनिधिहरुको उपस्थिति रहेको थियो।