काठमाडौँ । सुस्मा कोइराला मेमोरियल अस्पताल साँखुमा सातै प्रदेशका स्वास्थ्यकर्मीलाई जनलको उपचारका बारेमा जानकारी दिने उदेश्यले एकदिने तालिम प्रदान गरिएको छ ।
स्वास्थ्य तथा जनसङ्ख्या मन्त्रालय राष्ट्रिय तालिम केन्द्रको आयोजना तथा ईन्टरबर्न र ईन्टरप्रलास्ट नेपालको प्राविधिक सहयोगमा शुक्रबार एकदिने राष्ट्रिय स्तरको जलनसम्बन्धी उपचारका लागि आधारभूत तालिम प्रदान गरिएको हो ।
कार्यक्रममा ईन्टनबर्न दक्षिण एशियाका प्रमुख प्रशिक्षक डा रोजिना शिल्पकार स्वारले नेपालमा जलनको अवस्था भयावह रहेको बताउनुभयो । उहाँले जलनका विरामीले समयमा उपचार नपाउँदा अकालमै मृत्युवरण गर्नुपरेको तीतो यथार्थ नेपालसामु रहेको उल्लेख गर्नुभयो ।
राष्ट्रिय स्वास्थ्य तालिम केन्द्रका निमित्त निर्देशक माधवप्रसाद लम्सालले तालिममा जलनको अवधारणगत पक्ष, जलन पोषण, प्रेषण र पुर्नस्थापनाको महत्वको बारेमा जानकारी गराइएको बताउनुभयो ।
विश्व स्वास्थ्य सङ्गठन सन् २००९ को प्रतिवेदनअनुसार नेपालमा वर्षेनी ५५ हजारभन्दा बढी व्यक्ति जलनबाट पीडित हुने गरेका छन् । यस्तै, वार्षिक दुई हजार १०० व्यक्ति जलनबाट अकालमा ज्यान गुमाउनुपरेको छ ।
सन् १९९७ देखि जलनका विरामीलाई उपचार गराउँदै आएको सुस्मा कोइराला मेमोरियल अस्पतालले वार्षिक दुई हजारभन्दा बढी जलनका विरामीलाई प्लाष्टिक सर्जरीमार्फत उपचार गराउँदै आईरहेको अस्पतालका मेडिकल डाइरेक्टर डा विक्रम भण्डारीले बताउनुभयो ।
शुक्रबारको तालिममा सातै प्रदेशका विभिन्न अस्पतालमा कार्यरत १९ जनाको सहभागीता रहेको थियो ।
