काठमाडौं – ग्लोबल फाइनान्स म्यागेजिनले विश्वका उत्कृष्ट बैंकहरुमध्येबाट प्रदान गर्ने ‘‘वर्ल्ड वेस्ट बैङ्क अवार्ड–२०२४ ग्लोबल आइएमई बैंकलाई सम्मान गरेको छ ।
अमेरिकामा आयोजित एक कार्यक्रममा ग्लोबल फाइनान्स म्यागेजिनले ग्लोबल आईएमई बैंकलाई सम्मान गरेको हो । ग्लोबल बैंकका अध्यक्ष चन्द्र ढकालले ग्लोबल आइएमई बैंकका लागि यो धेरै ठूलो र ‘ग्लोबल’ पहिचान भएको बताउनुभएको छ ।
सामाजिक सञ्जालमार्फत् अध्यक्ष ढकालले भन्नुभएको छ– ‘यो अवार्डले ग्लोबल आइएमई बैंक मात्र नभएर नेपालको बैंकिङ तथा समग्र वित्तीय क्षेत्रलाई अझ उच्चस्तरीय सेवा प्रदान गर्न थप प्रोत्साहित गरेको छ भन्ने मलाई लागेको छ । यो खुसीको क्षणमा आदरणीय ग्राहक महानुभावहरु, नेपाल राष्ट्र बैंक, नेपाल सरकार, ग्लोबल आइएमई बैंकका कर्मचारी र सम्बद्ध सबैमा धन्यवाद र शुभकामना व्यक्त गर्न चाहन्छु । साथै यस खुसीको क्षणमा आगामी दिनहरुमा पनि अझै जिम्मेवार भई उच्चस्तरीय सेवा प्रदान गर्न हामी थप प्रतिबद्ध रहने प्रण गर्दछौँ ।’
