काठमाडौं – युरोपकै सबैभन्दा प्रतिष्ठित अन्तर्राष्ट्रिय पर्यटन मेला फितुर २०२६ मा नेपालको सक्रिय उपस्थितिले अन्तर्राष्ट्रिय पर्यटन बजारमा नेपालको
छवि थप मजबुत बन्नुका साथै अन्तर्राष्ट्रिय साझेदारी र व्यापार विस्तारका लागि ऐतिहासिक अवसर भएको बताएका छन् । स्पेनको म्याड्रिडमा २१ देखि २५
जनवरी २०२६ सम्म सम्पन्न ४६औँ संस्करणको फितुरले नेपाललाई पश्चिम युरोपेली बजारमा विविध पर्यटन गन्तव्यका रूपमा स्थापित गर्न रणनीतिक भूमिका खेलेको
उनले बताए ।
फितुर २०२६ मा नेपाल पर्यटन बोर्ड र नेपाल एसोसिएसन अफ ट्राभल एण्ड टुर एजेन्सीजको संयुक्त सहकार्यमा ३० वटा नेपाली ट्राभल, टुर तथा पर्यटन उद्यमी
संस्थाहरू सहभागी भएका थिए । मेलामा संस्कृति, पर्यटन तथा नागरिक उड्डयन सचिव मुकुन्दप्रसाद निरौला, बोर्डका सीईओ जोशीसहित अधिकारीहरुको उपस्थिति रहेको थियो ।
नेपाल पभेलियन उद्घाटन समारोहमा सम्बोधन गर्दै पर्यटन सचिव निरौलाले नेपाली पर्यटन व्यवसायीहरूलाई बधाई दिँदै यस्ता अवसरहरुलाई नेपालले सदुपयोग
गर्नुपर्ने समेत बताएका हुन् । सो अवसरमा नेपाल पर्यटन बोर्डका प्रमुख कार्यकारी अधिकृत (सीईओ) जोशीले नेपाल केवल ट्रेकिङ र पर्वतारोहण मात्र नभई
संस्कृति, जातीय विविधता, भाषा, जैविक विविधता र दिगो पर्यटनका लागि पनि उत्कृष्ट गन्तव्य भएको सन्देश अन्तर्राष्ट्रिय बजारमा प्रवाह भएको उल्लेख गरे ।
मेलाको दोस्रो दिन आयोजित “नेपालकनेक्ट” नेटवर्किङ कार्यक्रममा ५० भन्दा बढी अन्तर्राष्ट्रिय टुर अपरेटरहरू सहभागी भएका थिए ।
कार्यक्रममा सचिव निरौलाले विदेशी व्यवसायीहरूलाई नेपाली पर्यटन उद्यमीहरूसँग सहकार्य गर्न आग्रह गर्दै गुणस्तरीय सेवा र सुरक्षित पर्यटनको सुनिश्चितता व्यक्त गरे ।
कार्यक्रममा स्पेनस्थित नेपाली दूतावास, यूएन टुरिजम्, अन्तर्राष्ट्रिय सञ्चारमाध्यम, ब्लगर, भ्लगर तथा इन्फल्युन्सरहरूको उपस्थिति थियो ।
नेपाल पभेलियनमा अन्तिम दुई दिन आयोजना गरिएको नेपाली सांस्कृतिक कार्यक्रम मेलाको प्रमुख आकर्षण बन्यो । नेपाली नृत्य, गीत, संगीत र संस्कृतिको विविध
प्रस्तुतीले ठूलो संख्यामा दर्शक तानेको थियो भने छिमेकी देश मलेसियाका कलाकारहरू समेत सहभागिता जनाउँदै कार्यक्रमलाई थप जीवन्त बनाएका थिए । यस
वर्षको फितुर २०२६ मा ६१ देशका करिब १० हजार कम्पनीहरू सहभागी भएका थिए, जुन अघिल्लो वर्षको तुलनामा ५ प्रतिशतले वृद्धि हो ।
