काठमाडौँ – नेपाल उद्योग वाणिज्य महासंघका अध्यक्ष चन्द्रप्रसाद ढकालले राजनीतिक परिवर्तनसँगै बन्न लागेको नयाँ सरकारले स्थायी र निजी क्षेत्रमैत्री नीतिहरू ल्याउनुपर्ने बताएका छन् ।
ढकालले आगामी सरकारले करिब दुई तिहाई बहुमत नजिकको सरकार बन्न लागेकोले निजी क्षेत्रसँग सम्बन्धित विषयहरू रास्वपाको वाचापत्रमा पनि समावेश रहेको उल्लेख गरे। उनका अनुसार वाचापत्रमार्फत व्यक्त गरिएका निजी क्षेत्रमैत्री प्रतिवद्धताहरू इमानदारीपूर्वक कार्यान्वयन गर्नुपर्छ। यदि ती प्रतिवद्धताहरू प्रभावकारी रूपमा लागू भएमा छोटो समयमा धेरै काम गर्न सम्भव हुनेछ।
अध्यक्ष ढकालका अनुसार सरकारले वाह्य तथा आन्तरिक लगानीलाई प्रोत्साहन गर्ने खालका नीतिहरू बनाउनु आवश्यक छ। उनले कतिपय भूतप्रभावी कानूनका कारण लगानीकर्तामा निराशा आइरहेको भन्दै त्यस्ता कानून लागू नहुने सुनिश्चितता राज्यले गर्नुपर्ने बताए ।
ढकालका अनुसार भूतप्रभावी कानून लागू नहुने सुनिश्चितता भएमा मुलुकमा छिट्टै आर्थिक गतिविधि बढाउन सकिन्छ, आन्तरिक रोजगारी सिर्जना गर्न मद्दत पुग्छ, र राजश्व सङ्कलन बढेसँगै पूर्वाधार निर्माणमा समेत सहयोग पुग्छ।
