काठमाडौं– भारत सरकारको आर्थिक सहयोगमा झापाको शिवसताक्षी नगरपालिका–६ स्थित श्री जन आदर्श माध्यमिक विद्यालयको नयाँ भवन निर्माणका लागि बुधबार शिलान्यास गरिएको छ।
विद्यालय भवनको संयुक्त रूपमा कोशी प्रदेश सभा सदस्य राधाकृष्ण खनाल, शिवसताक्षी नगरपालिकाका मेयर मेगाहाङ्ग थोप्रा तथा काठमाडौंस्थित भारतीय राजदूतावासकी द्वितीय सचिव गरिमा नौटियालले शिलान्यास गरेका हुन्।
भारतीय राजदूतावासका अनुसार करिब ३ करोड नेपाली रुपैयाँको लागतमा निर्माण हुने उक्त भवन भारत सरकारको आर्थिक सहयोगमा उच्च प्रभाव सामुदायिक विकास परियोजना अन्तर्गत निर्माण हुनेछ। परियोजना शिवसताक्षी नगरपालिकामार्फत कार्यान्वयन गरिनेछ।
शिलान्यास कार्यक्रममा मेयर थोप्रासहित स्थानीय सरोकारवालाले भारत सरकारले उपलब्ध गराउँदै आएको विकास सहयोगको प्रशंसा गरे ।
नयाँ विद्यालय भवनले विद्यार्थी र शिक्षकका लागि गुणस्तरीय तथा सहज शैक्षिक वातावरण सिर्जना गर्न सहयोग पुग्ने विश्वास उनीहरूले व्यक्त गरेका थिए।
भारतीय राजदूतावासले नेपाल र भारतबीचको विकास साझेदारी बहुआयामिक रहेको उल्लेख गर्दै उच्च प्रभाव सामुदायिक विकास परियोजनामार्फत शिक्षा लगायत प्राथमिकताका क्षेत्रमा पूर्वाधार निर्माण गरी नेपाल सरकारको विकास र समृद्धिको प्रयासलाई निरन्तर सहयोग गर्दै आएको जनाएको छ।
