काठमाडौं – संस्कृति, पर्यटन तथा नागरिक उड्डयनमन्त्री खडकराज पौडेलले नेपाल वायुसेवा निगम (नेपाल एयरलाइन्स) को आमूल सुधारका लागि सार्वजनिक–निजी साझेदारी (पीपीपी) मोडलमा लैजानुपर्ने बताउनुभएको छ ।
नेपालका पर्यटन व्यवसायीहरूको छाता सङ्गठन नेपाल एशोसिएशन अफ टुर एण्ड ट्राभल एजेन्ट्स (नाटा) को ५९औँ अधिवेशनलाई शुक्रबार सम्बोधन गर्दै मन्त्री पौडेलले राष्ट्रिय ध्वजावाहक निगम चरम ऋण, राजनीतिक हस्तक्षेप र कर्मचारीतन्त्रको बेथितिमा फसेकाले पुनर्संरचना आवश्यक रहेको बताउनुभयो ।
निगम सुधारका विषयमा आफू अध्ययनकै क्रममा रहेको जानकारी दिँदै उहाँले नेपाल एयरलाइन्सलाई उद्धार गर्न पीपीपी मोडलमा लैजानुपर्ने आफ्नो स्पष्ट धारणा रहेको बताउनुभयो । यसका लागि सरोकारवालाहरूको साथ र सहयोग आवश्यक रहेको उल्लेख गर्दै मन्त्री पौडेलले सार्वजनिक क्षेत्रमा समेत यस विषयमा वैचारिक बहस सिर्जना गर्न आग्रह गर्नुभयो ।
“राष्ट्रिय ध्वजावाहकप्रति हामी सबैको गर्व छ तर हाल यो ऋणमा चुर्लुम्म डुबेको र विभिन्न बेथितिमा फसेको अवस्था छ । यसलाई राजनीतिक र कर्मचारीतन्त्रको दलदलबाट बाहिर निकालेर बचाउन आमूल पुनर्संरचना आवश्यक छ,” उहाँले भन्नुभयो ।
नेपालको पर्यटन प्रवद्र्धन र पर्यटकीय गन्तव्यको लक्ष्य पूरा गर्न बलियो राष्ट्रिय ध्वजावाहक आवश्यक रहेको मन्त्री पौडेलको भनाइ थियो । राष्ट्रिय ध्वजावाहकको सुधारबिना पर्यटन क्षेत्रको अपेक्षित विकास सम्भव नहुने उहाँले बताउनुभयो ।
“राष्ट्रिय ध्वजावाहकको सुधारबिना पर्यटकीय गन्तव्यको लक्ष्य पूरा गरेका कुनै पनि देश मैले देखेको छैन । त्यसैले नेपालको पर्यटन प्रवद्र्धनका लागि निगमको सुधार हुनैपर्छ,” मन्त्री पौडेलले भन्नुभयो ।
उहाँले पर्यटन क्षेत्रको विकासका लागि नेपालसँग प्रभावकारी र सक्षम राष्ट्रिय ध्वजावाहक हुनुपर्नेमा जोड दिनुभयो ।
