काठमाडौँ – सरकारले सशस्त्र प्रहरी बल (एपीएफ) को महानिरीक्षक (आईजी) पदमा एआईजी नारायणदत्त पौडेललाई नियुक्त गर्ने निर्णय गरेको छ। सोमबार बसेको मन्त्रिपरिषद् बैठकले उक्त निर्णय गरेको सरकारका प्रवक्ता तथा शिक्षा मन्त्री सस्मित पोखरेलले जानकारी दिएका छन्।
हालका आईजी राजु अर्याल आगामी वैशाख १८ गतेबाट अनिवार्य अवकाशमा जान लागेकाले नयाँ नेतृत्व चयन गरिएको हो। अर्यालले २०७९ वैशाख १९ गतेदेखि सशस्त्र प्रहरी बलको नेतृत्व सम्हाल्दै आएका थिए। कानुनी व्यवस्था अनुसार सशस्त्र प्रहरीको आईजी पदावधि चार वर्षको हुने प्रावधान रहेको छ।
आईजी पदका लागि एआईजी नारायणदत्त पौडेलसँगै एआईजी वंशीराज दाहाल पनि प्रतिस्पर्धामा रहेका थिए। पौडेल २०७९ जेठ ६ गते एआईजीमा बढुवा भएका थिए भने दाहाल २०७९ असोज २८ गते सो पदमा पुगेका थिए। वरीयताका आधारमा पौडेल पहिलो नम्बरमा रहेकाले सरकारले उनलाई नै आईजीमा नियुक्त गर्ने निर्णय गरेको हो।
