काठमाडौँ, १ पुस । पर्यटन व्यवसायीहरुको छाता संगठन टुरिष्ट बस एशोसियशन अफ नेपाल (टिवान)को टोलीले महानगरीय ट्राफिक प्रहरी महाशाखाका प्रमुख, प्रहरी वरिष्ठ उपरीक्षक जनक भट्टराईसँग भेट गरेको छ ।
टिवानका प्रथम उपाध्यक्ष ढकनाथ काफ्लेको संयोजकत्वमा पुगेको टोलीले आज महाशाखा प्रमुख भट्टराईसँग भेट गरेको हो । भट्टराई महाशाखा प्रमुख भएर आएपछि भएको पहिलो भेटका क्रममा टिवानको टोलीले पर्यटक बसले उपत्यका भित्रिएपछि भोग्नुपरेको समस्याबारे अवगत गराएको थियो ।
उनीहरुले पर्यटक बसलाई बालाजुबाट सोह्रखुट्टेसम्म सञ्चालन गर्न दिनुपर्ने, पर्यटक बसका चालक र सहचालकलाई तालिमको व्यवस्था मिलाउनुपर्नेलगायतका माग राखेका थिए ।
भेटपछि महाशाखा प्रमुख भट्टराईले उपत्यकाको ट्राफिक व्यवस्थालाई राम्रो बनाएर जान ट्राफिक प्रहरी र व्यवसायी सहकार्य गरेर अगाडि बढ्ने प्रतिवद्धता व्यक्त गर्नुभएको थियो ।
भेटमा टिवानका महासचिव दिपेन्द्र अधिकारी, पूर्व महासचिव दिपक भट्टराई, पर्यटक बस व्यवसायी मिलन नेपाललगायतको उपस्थिती रहेको थियो ।
