काठमाडाैँ –  धनगढीमा अनशनरत डा. गोविन्द केसीसँग सरकारले औपचारिक वार्ता थालेको छ। शनिबार धनगढी पुगेको शिक्षा तथा खेलकुद मन्त्रालयको टोलीले आइतबार डा. केसी पक्षसँग वार्ता सुरु गरेको हो।

वार्तामा सरकारका तर्फबाट शिक्षा मन्त्रालयका सचिव चूडामणि पौडेल, स्वास्थ्य तथा खाद्य स्वच्छता मन्त्रालयका सचिव डा. विकास देवकोटा र प्रधानमन्त्रीका स्वास्थ्य विज्ञ सल्लाहकार प्राडा जगदीश अग्रवाल सहभागी छन्। साथै, रास्वपा सांसद पुकार बम पनि सरकारी वार्ता टोलीमा सहभागी छन्।

डा. केसीका सहयोगी अमृत जैसीका अनुसार अहिले दुवै पक्षबीच वार्ता जारी छ। केसी पक्षबाट जैसीसहित अर्का एक जना वार्तामा सहभागी छन्।

डा. केसीले उठाएका माग सम्बोधन गर्ने विषयमा सहमति जुटाउने उद्देश्यले सरकार र केसी पक्षबीच छलफल भइरहेको हो।