काठमाडौं – प्रधानमन्त्री दैवी प्रकोप उद्धार कोषमा आफूले एक लाख २० हजार रुपैयाँ सहयोग गरेको भन्दै नक्कली कारोबार विवरण तयार गरी सामाजिक सञ्जालमा प्रचार गर्ने एक व्यक्ति पक्राउ परेका छन्।
जिल्ला प्रहरी कार्यालय रामेछापका अनुसार पक्राउ पर्नेमा गोकुलगंगा गाउँपालिका–२ ठोसेका ३२ वर्षीय भगवान कार्की रहेका छन्।
प्रहरीका अनुसार भदौ १० गते रसुवा जिल्लाको भोटेकोशी नदीमा आएको बाढीबाट प्रभावितको उद्धार तथा राहतका लागि नेपाल सरकारले सञ्चालन गरेको प्रधानमन्त्री दैवी प्रकोप उद्धार कोषमा आफूले एक लाख २० हजार रुपैयाँ सहयोग गरेको भन्दै कार्कीले कृत्रिम बुद्धिमत्ता प्रविधि ‘च्याट जीपीटी’को प्रयोग गरी नक्कली कारोबार विवरण तयार गरेका थिए।
उनले उक्त नक्कली विवरणमा आफ्नो क्यूआर कोड समेत राखी सामाजिक सञ्जालमा सार्वजनिक गरेको प्रहरीले जनाएको छ।
नक्कली कारोबार विवरणमा एक लाख २० हजार रुपैयाँ सहयोग गरेको, सहयोगको प्रयोजनका रूपमा प्रधानमन्त्री दैवी प्रकोप उद्धार कोष उल्लेख गरिएको तथा कारोबार पूरा भएको देखाइएको थियो।
घटनाबारे जानकारी पाएपछि प्रहरीले कार्कीलाई नियन्त्रणमा लिएको हो। उनीमाथि थप अनुसन्धान भइरहेको जिल्ला प्रहरी कार्यालय रामेछापले जनाएको छ।
